I.
Quant nois et giaus et froidure
remaint od le tanz felon,
que flours et fueille et verdure
vient od la bele saison,
lors chant sanz envoiseüre,
dont j'ai si droite ochoison;
que j'aim'd'amour qui trop dure
sans gré et sanz guerredon.
II.
Mout fu de crüel nature
qui Amour fist sanz reson;
qu'en li ai mise ma cure
et toute m'entention.
Maiz loiautez et droiture
ne m'i font se nuire non;
bien est folz qui s'asseüre
en li ne en son douz non.
III.
Conment que joïr en doie,
lonc tanz m'a Amours grevé;
si ne sai, se Diex me voie,
se j'ai plus que nus amé.
Chascuns jure et se desloie
qu'Amours l'ont trop mal mené;
maiz pour rienz n'en mentiroie,
que que m'en ait destiné.
IV.
De tant ma dame me croie,
si l'en savroie bon gré,
s'a son plesir estoit moie,
par la foi que je doi Dé,
ja si grant joie n'avroie
d'autre amour en mon aé;
n'a mon tort ne leisseroie
a fere sa volenté.
V.
Dame, mains trechieres prie,
maiz je vous aim finement;
ja pour avoir d'autre aïe
ne vivroie longuement,
car la vostre conpaignie
me plaist issi doucement
que ja n'en iert departie
m'amors, a mon escïent.
VI.
Que que losengiers vous die,
douce dame, a vous me rent;
s'en moi cuident trecherie
vers vous, n'en i a neient,
ainz serai toute ma vie
a vostre conmandement.
Fins amis vers douce amie
doit estre qui Amours prent.
VII.
Ha, Monnet, losengerie
de la felenesse gent
mal m'a fet, Diex les maudie!
que jel sai certeinnement.