I.
Quant noif et geus et froidure
Remaint o le tens felon,
Que flors et fueille et verdure
Vient o la bele seson,
Lors chant sens envoiseüre,
Dont j'ai si droite achoison;
Que j'aim'd'amor qui trop dure,
Sans gré et sens guerredon.
II.
Mout fu de crüel nature
Qui Amor fist sens raison;
Qu'en li ai mise ma cure
Et tote m'entencion.
Mes loiautez et droiture
Ne m'i font se nuire non;
Bien est fous qui s'asseüre
En li ne en son dous non.
III.
Conment que joïr en doie,
Lonc tens m'a Amours grevé;
Si ne sai, se Deus me voie,
Se j'ai plus que nus amé.
Chascuns jure et se desloie,
Qu'Amours l'ont trop mal mené;
Mais pour rien n'en mentiroie,
Que que m'en ait destiné.
IV.
De tant ma dame me croie,
Si l'en savroie bon gré,
S'a son plesir estoit moie,
Par la foi que je doi Dé,
Ja si grant joie n'avroie
D'autre amour en mon aé;
N'au mien tort ne leisseroie
De fere sa volenté.
V.
Dame, mainz trichiere prie,
Mes je vos aim finement;
Ja por avoir d'autre aïe
Ne prierai longuement,
Car la vostre conpaignie
Me plest issi doucement
Que ja n'en iert departie
M'amors, a mon escïent.
VI.
Que que losengiers vous die,
Douce dame, a vos me rent;
S'en moi cuident tricherie
Vers vos, n'en i a niënt;
Ainz serai tote ma vie
A vostre comandement;
Fins amis vers douce amie
Doit estre qui Amors prent.
VII.
Ha, Monnet, losengerie
De la felonnesse gent
Mal m'a fait, Dieus les maudie!
Que jel sai certainement.