Petersen Dyggve

Versione stampabilePDF version

I.
Quant flors et glaiz et verdure s'esloingne,
que cil oisel n'osent un mot soner,
por la froidour chascun doute et resoingne,
jusqu'au beau temps que il suelent chanter,
lors chanterai, que ne puis oblïer
la douce amour, dont Dex joie me doigne,
car de li sont et viennent mi penser.
 
II.
Coment qu'Amors joie me guierredoigne,
trop le me fait chierement conparer,
si com celui qui delaie et porloingne,
et si me vuet a son plaisir grever.
Je ne di pas qu'on puisse trop amer,
ne qu'ele ja de mon cuer se desjoigne,
qu'ele a trové tel qui ne set fauser.
 
III.
Vos amerai, dame, coment qu'il preingne,
si finement, et Dex m'en doint pooir,
ne ja Amors n'iert telx qu'ele se faigne
de moi aidier, s'ele mi puet valoir.
Tant me covient vostre plaisir voloir,
qu'assez aing mieuz que li merirs remaingne,
qu'aie de vos joie par decevoir.
 
IV.
Pou prie nus que li cuers ne se faigne
plus que li diz, ce seit on bien de voir;
si me mervoil que ma dame desdaigne
loial ami, qu'autre ne puet avoir.
Ainsi m'estuet morir en bon espoir,
que j'ai un cuer qui si amer m'ensaigne;
dame, merci, quant ne puet remenoir.
 
V.
Bien est raisons que longue atente creingne,
que c'est la riens qui plus m'avra grevé.
Quels costume ne quelz maus qu'en aveingne,
envers Amors n'avroit nus poësté.
Por ce vos pri, douce dame, por Dé,
que de mes maux vos remembre et soveingne,
que sanz merci ne puënt estre osté.
 
VI.
En vous n'a rien, dame, qui descoviegne,
tant a en vos sens et pris et beauté;
por Deu vos pri que vostre cuers reteingne,
selonc voz biens, grant debonaireté.
Assez vos aing plus que rien n'ai amé,
ne ja sanz vos grant joie ne me veingne:
s'el me venoit, ne l'en savroie gré.
 
VII.
Fins amorox, en vos sont mi pansé;
gardez qu'amors et joie vos mainteigne,
plus que les .ii. qui tant ont demoré.