I.
Quant flors et glais et verdure s'esloingne,
Que cil oisel n'osent un mot soner,
(Por la froidor chascun dote et resoingne,
Jusqu'au biau tens qu'il resuelent chanter,)
Lors chanterai, que ne puis oblier
La douce amor, dont Dieus joie me doigne,
Car de li sont et muevent mi penser.
II.
Coment qu'Amors joie me guerredoigne,
Bien le me fet chierement comparer,
Si comme cil qui delaie et porloingne,
Et si me vuet a son plesir grever.
Je ne di pas qu'on puisse trop amer,
Ne qu'ele ja de mon cuer de li desjoigne,
Qu'el a trové tel qui ne set fauser.
III.
Vos amerai, dame, comnent qu'il praingne,
Si finement (et Deus m'en dont pouoir),
Ne ja Amors n'ert tels qu'ele se faigne
De moi aidier, s'ele mi puet valoir.
Tant me covient vostre plesir voloir
Qu'assez aim mieus que li merirs remaingne,
Qu'aie de vos joie par decevoir.
IV.
Pou prie nus que li cuers ne se faigne
Plus que li diz, ce set on bien de voir;
Si me merveil quant ma dame desdaigne
Loial ami, qu'autre ne puet avoir.
Ainsi m'estuet morir en bon espoir,
Que j'ai un cuer qui a amer m'ensaigne;
Dame, merci, ne puet plus remanoir.
V.
Bien est resons ke longue atente creingne,
Que c'est la rien qui plus m'avra grevé.
Quels costume ne quelz maus qu'en aviengne,
Encontre Amor n'avroit nus poësté.
Por ce vos pri, belle dame, por Dé,
Que de mes maus vos remembre et soviengne,
Que sans merci ne pueënt estre osté.
VI.
En vos n'a rien, dame, qui descoviengne,
Tant a en vos sens et pris et beauté;
Pour Deu vos pri que vostre cuers retiengne,
Selonc voz biens, grant debonereté.
Assez vos aim plus que rien n'ai amé;
Ne ja sens vos grant joie ne me viegne;
S'el me venoit, ne l'en savroie gré.
VII.
Fins amoros, en vos sont mi pensé;
Gardez qu'amors et joie vos maintiegne,
Plus que les .ij. que tant ont demoré.