I.
Quant bone dame et fine Amors me prie,
Encor ferai chançon cointe et joïe,
Ne ja ne quier envios mot en die,
Car onques nes amai
Ne ja nes amerai,
Et quis aime bien sai
Qu'il fet cruel folie,
Qu'envios sont de laide vilenie.
II.
De bone amor sai qu'est preste et garnie,
De guerredon, de confort et d'aïe
Vers fin ami, qui l'a de cuer servie.
Por ce la servirai
Tant que por li morrai,
Ou par son don savrai
Qu'est granz joie d'amie,
Car ja sens ce n'avrai cointable vie.
III.
Fine amors est de tel force establie
Que sor toz bons claime droite mestrie,
Ja fins amis n'iert teus qu'il m'en desdie.
Car je li otroiai
Que siens sui et serai;
En li me fierai
Et en sa seignorie,
Qui les bons fet et de bons est norrie.
IV.
La haute honor que j'ai de vous oïe,
Et li bons pris, dame, m'ocit d'envie,
Fine beautez, sens pleins de cortoisie,
Dont tant en vos trovai,
Quant veoir vos alai,
Qu'onques puis n'obliai
Ma volenté hardie
Du desirrier que fins amis n'oblie.
V.
Dame merci, tres granz amours me lie
Qui m'est el cuer racinée et florie;
Ne n'ai voloir que de rien l'escondie.
Ainz di que j'atendrai
Od les mauz que j'en trai,
Tant que l'ore verrai
Venue et acomplie
Que de vos iert en moi a droit partie.
VI.
Dame, ensi soffrerai
Tant com vivre porrai,
Ne ja voir ne croirai
Que vos soiez traïe
Par faus amanz qu'Amors n'a en baillie;
Que l'endemain seriez esbahie.