I.
Quant voi l'erbe resprendre
Par ces prez et renverdir,
Lors vueil a chanter entendre,
Que ne m'en puis plus tenir;
Qu'Amors me fait ce emprendre
Qu'est mout grief a meintenir;
Amer sens guerredon rendre
Ne puet mie cuers soffrir,
Ne longuement meintenir,
Sens confort ou sens merir.
II.
Ja ne me grevast l'atendre
S'au loing me vousist oïr;
Mes por c'est ma joie mendre,
Que je redout le faillir.
La fin d'amor vueil aprendre
Que j'en sai jusqu'au morir;
Ne nuns ne me puet defendre
A amer ou a haïr;
Si me plest a meintenir
Amor, qu'el me puet merir.
III.
Dame, sor totes amée
De loial cuer sens trichier,
Belle et blonde et acemée,
Mes ne vos sai losengier;
Loin sui de vostre contrée,
Ce me fait plus esmaier;
Por tant est l'amors doblée,
Dont ne vos os aresnier,
Tant vos dot a corrocier,
Car ce ne m'avroit mestier.
IV.
N'ai pas la joie obliée
Dou dous termine premier
Que l'amor me fu donée,
Dame, que toz jors requier;
Mais tost me refu vehée,
Quant vos plot a essaier
Coment ire est tost montée
La ou joie est a dangier.
Si ne m'en os corrocier,
Que de servir ai mestier.
V.
Amor a grant seignorie
Sor moi, bien le m'a mostré;
Por ce nel retrai je mie
Qu'a li n'aie mon pensé;
Et se ma dame m'oblie,
Tant li cri merci, por Dé,
Qu'ele reconoisse et die
Que l'ai loiaument amé;
Adonc li soit pardonné
Se je moroie por lé.
VI.
Felon losengier d'envie
Meint home avront grevé;
Mes pou vaut lor felonie
Vers la debonaireté
Celi qui en sa baillie
A si mon cuer atorné.
Haï, fause gent haïe!
Car fust de vos a mon gré!
Ne vos seroit pardonné,
Par la foi que je doi Dé.
VII.
Gasçoz qui tant a amé
Amera tout son aé.
Desirranment si pri Dé
Qu'endroit li n'i ait fausé.