I.
Cil qui aime de bone volenté,
Devroit adès estre en bone espérance
Et je, qui ai lonc tens de cuer amé,
N'en puis avoir fors ire et grant pesance.
Celi ne plest en cui j'ai ma fiance.
Or me doint Dieus que je la serve en gré,
Tant qu'ele m'ait de ma dolor geté.
II.
Douce dame, por coi m'avez grevé?
C'onques vers vos ne fis descovenance;
Ainçois vos ai servie en leauté,
Et servirai toz jors sens repentance.
Por Deu vos pri qu'en aiez remembrance,
Que me soient li mal guerredoné
Que j'ai por vos soffert et enduré.
III.
Tels genz i a qu'aprennent a mentir
De bone amor, et dient vilonie:
C'est por nient, qu'il n'en poront joïr,
Que la bele ne les en croira mié
Ou il a tant valor et cortoisie
Que morir cuit quant m'estuet sovenir
De son gent cors ou ne puis avenir.
IV.
Or ne sai je que puisse devenir,
Se fine Amors, qui m'a en sa baillie,
Ne fet mon cuer en joie revertir;
Pechié fera se ele ainsi m'oblie;
Endroit de moi ne l'oblierai mie,
Ainz sui toz siens por fere son plesir;
Or soit en li de vivre ou de morir.
V.
Li grant desir et li tres dous penser
Que j'ai en vos me douent par droiture,
Dame, que je vos doie plus amer
Que je ne faz nule autre creature.
S'en doiez bien vers moi estre mains dure,
Tant que pitiez puisse amors mercier
De moi qui sui toz vostres sens fauser.
VI.
Chançons, di li que cil n'a d'amors cure
Qui se peine de celés a guiler
Ou on ne puet fors leauté trover.