I.
Cil qui aime de bone volenté
devroit adés estre en bone esperance,
et je qui ai lonc tens cuer amé
n'en poi avoir fors ire et grant pesance,
se li ne plaist en cui j'ai ma fiance.
Or me doint Dex que je la serve en gré,
tant qu'ele m'ait de ma dolor osté.
II.
Dolce dame, por coi m'avez grevé,
c'onques vers vos ne fis descovenance,
ainceis vos ai servie en lealté
et servirai toz jors senz repentance.
Por ceu lo di q'en aiez remambrance,
que me soient li mal guerredoné
que j'ai por vos soffert et enduré.
III.
Tels genz i a k'aprennent a mentir
de bone amor et dient vilonie.
Ceu n'a mestier: ja n'en poront joïr,
que la bele ne les en croira mie,
ou il a tant valor et cortoisie
que morir cuiz quant m'estuet sovenir
de son gent cors ou ne puis avenir.
IV.
Or ne sai je que puisse devenir,
se fine Amors qui m'a en sa baillie
ne fait mon cuer en joie revertir;
pechié fera se ele ensi m'oblie;
endroit de moi ne l'oblïerai mie,
ainz sui toz siens pour faire son plaisir:
or soit en li de vivre ou de morir.
V.
Li granz desirs et li tres dolz panser
que j'ai en vos me donnent par droiture,
dame, que je vos doie plus amer
que je ne faz nule altre creature,
s'en devez bien vers moi estre mains dure,
tant que Pitiez puisse Amors mercïer
por moi qui sui toz vostres senz falser.
VI.
Chansons, di li que cil n'a d'amors cure
qui se poine de celes a guiler
ou on ne puet fors lealt trover.