| I | |
| Tant ai amors serui es longuement que des or mes ne men doit nus re prendre. se ie men part ore adieu les comant. quen ne doit pas touz iors folie enprendre. et cil est fox q(ui) ne sen set desfendre. ne ni conoist son mal ne son tor ment. len mentendroit des ormes por enfant. car cha scun tens doit sa saisson atendre |
Tant ai amors servies longuement que dés or més ne m’en doit nus reprendre se je m’en part. Ore a Dieu les comant, qu’en ne doit pas touz jors folie enprendre; et cil est fox qui ne s’en set desfendre ne n’i conoist son mal ne son torment. l’en m’en tendroit dés or més por enfant, car chascun tens doit sa saisson atendre. |
| I | |
| Ie ne sui pas si con cil autre gent. qui ont ame puis i uuellent contendre. et die(n)t mal par mautalent. mes nus ne doit seignor seruise vendre. encontre lui mes dire ne mesprendre. et sil sen part parte sen mainte nant. endroit demoi uueil ie que tuit amant aient grant bien quant ie plus ni puis prendre. |
Je ne sui pas si con cil autre gent qui ont amé, puis i vuellent contendre et dïent mal par mautalent. Més nus ne doit seignor servise vendre encontre lui mesdire ne mesprendre; et s’il s’en part parte s’en maintenant. Endroit de moi vueil je que tuit amant aient grant bien, quant je plus n’i puis prendre. |
| I | |
| Amors ma fait maint bie(n) tres ques ci. quele ma fait amer sans uilainie. la pl(us) tres bele (et) la meillor ausi. au mien cuidier qui onq(ue)s fust fu choisie. amors le ue ut (et) madame menprie. que ie men parte (et) ie m(o)lt len merci. quant par le gre ma dame men chasti. meillor raison ni uoi ama partie. |
Amors m’a fait maint bien tresques ci, qu’ele m’a fait amer sanz vilainie la plus tres bele et la meillor ausi, au mien cuidier, qui onques fust fu choisie. Amors le veut et ma dame m’en prie que je m’en parte et je molt l’en merci. Quant par le gré ma dame m’en chasti, meillor raison n’i voi a ma partie. |
| I | |
| Autre chose ne ma amors meri. de tant con iai este en sa baillie. mais bien ma dieus par sa pitie gari. q(ua)nt deliure ma desa seignorie. quant eschape li sui sans perdre uie. ains de mes euz sibon estre ne ui. si cuit ie faire encor maint gieu par ti. et maint sonet (et) mai(n)te rauerdie. |
Autre chose ne m’a Amors meri de tant con j’ai esté en sa baillie, mais bien m’a Dieus par sa pitié gari, quant delivré m’a de sa seignorie. Quant eschape li sui sans perdre vie, ains de mes euz si bon estre ne vi, si cuit je faire encor maint gieu parti et maint sonet et mainte raverdie. |
| I | |
| Au comencier. se doit on bien garder; dentreprendre chose desmesuree. mes bone amor ne lait home apenser. ne bien choisir ou mete sa pensee. plus tost aime on en estrange contree. ou on ne peut ne uenir ne aler. quen ne fait ce quen peut touz iors trouer. ici est bien la fo lie esprouee. |
Au comencier se doit on bien garder d’entreprendre chose desmesuree, més bone Amor ne lait home a penser ne bien choisir ou mete sa pensee. Plus tost aime on en estrange contree, ou on ne peut ne venir ne aler, qu’en ne fait ce qu’en peut touz jors trover; ici est bien la folie esprovee. |
| I | |
| Or me gart dex (et) damors (et) damer. fors de cele que len doit aorer. ou len ne peut faillir a grant soudee. |
Or me gart Dex et d’amors et d’amer fors de cele que l’en doit aorer, ou l’en ne peut faillir a grant soudee. |