 Aussi com unicorne sui. ki sesbashist en regardant quant la pucele uait mirant. tant est lie de son anui. pasmee chiet en son giron. la locist on en traison. (et) moi ont mort ditel samblant. amours (et) ma dame pour uoir. mon cuer ont nel puis pas rauoir. |
 Dame quant ie deuant uous fui (et) ie uous ui premierent. mes cuers aloit si tressalant. kil uous remest quant ie men mui. lors fui menes sans raencon. en la douce cartre en prison. dont li piler sont de talent. (et) li huis est de biau ueoir. (et) li anel de boin espoir. |
 De la cartre a le clef amours (et) si ia mis trois portiers. biaus sam blans a non li premiers. (et) biautes ciaus en fait signours. dangier a mis a luis deuant. un ort uilain felon puant. ki est mais (et) pautoniers. cil troi sont (et)uiste (et) hardi. mout ont tost un hon me saisi. |
 Ki porroit sousfrir les tristours (et) les assaus de ces huis siers onkes rollans ne oliuiers ne uenquirent si grans estours. Il uenquirent en combatant. mais cil uaint en humeliant. Souf- frirs en est gonfanouniers. mais en cestui dont ie uous di na nul secours fors de merci. |
  Dame ie ne redout mais riens. puis ke tant fail a uous amer. tant ai empris a endurer ke ie sui uostres tout par us. (et) se il uous en pesoit bien. ne men puis ie partir pour rien. ke ie naie le ramenbrer. (et) ke mes cuers ne soit adies. en uo pri son (et) de moi pres. Dame quant ie nesai giller. mercis seroit bien de saison mais de soustenir si grief fais. |