I.
Quant bone dame et fine Amours me prie,
encor ferai chanson cointe et joïe,
ne ja ne quier qu'enuieus mot en die,
car onques nes amai
ne ja nes amerai,
et quis aime bien sai
qu'il fait crüel folie,
qu'enuieus sunt plain de grant vilenie.
II.
De bone Amour sai qu'est preste et guarnie
de guerredon, de confort et d'aïe
vers fin ami, quant l'a de cuer servie.
Pour ce la servirai
tant que pour li morrai
u par son gré savrai
con grant joie est d'amie,
que ja sanz li n'avrai cointable vie.
III.
Fine Amours est de tel force establie
que seur touz bons cleime droit et mestrie,
ja fins amis n'iert teus que m'en desdie,
car je li otroiai
que suens sui et serai;
en li me fïerai
et en sa seignourie,
qui les bons fet et de bons est norrie.
IV.
La haute honours que j'ai de vous oïe,
et li granz pris, dame, m'ocit d'envie,
fine biautez, sens plainz de courtoisie,
dont en vous tant trovai
quant veoir vous alai
que par ce enamai
la volenté hardie
du desirrier que fins amis n'oublie.
V.
Dame merci, tres granz amours me lie
qui m'est u cuer racinee et florie,
si n'ai pooir que je la contredie,
ainz di que j'atendrai
od les mauz que i'en trai,
tant que l'eure verrai
venue et acomplie
que de vos iert en moi a droit partie.
VI.
Dame, ensi soffrerai
tant con vivre porrai
ne ja voir ne querrai
que vous soiez trahie
par faus amant c'Amours n'a en baillie.