I.
– Gasse, par droit me respondez;
de vous le me couvient oïr:
se je me sui abandonnez
loiaument a Amour servir,
et celle me vueille traïr
a qui je m'estoie donnez,
dites moi le quel me loez,
ou de l'atendre ou del guerpir.
II.
– Sire, n'en sui pas esgarez;
de ce sai bien le miex choisir.
se finement de cuer l'amez
et loial sont vostre desir,
n'i a noient del repentir.
Més outre vo pooir servez:
nulz n'iert ja tant d'Amours grevez
qu'ele ne puist cent tans merir.
III.
– Qu'est ce, Gasse? Estes vous desvez?
Me volez vous afolatir?
Ceste amour que vous me loez
devroit tous li mondes fuïr.
Tous jours amer et puis morir!
Vilainement me confortez.
Quant j'en ai les maulz endurez,
dont deveroie bien joïr.
IV.
– Sire, pour Dieu, or entendez
a droit et reson maintenir!
Cuers qui bien est enamourez
comment puet il d'amours partir?
Nes que je puis blons devenir
n'en porroit il estre tournez.
S'il vous plest, de ce me creez:
ami traï muerent martir.
V.
– Gasse, bien sai que vous pensez;
més Amours lais a couvenir.
Ne sui pas si amesurez
que je plus le vueille obeïr.
Ne porroie plus consentir
les felenesses cruautez,
et vous, qui goute n'i veés,
ne vous en savez revenir.
VI.
– Sire, one mais puis que je fui nez
ne vous vi de riens esbahir,
ou la raison me mescontez,
que le voir ne volez jehir.
Comment se puet avilonnir
fins cuers et loiaux volentez?
Laidement vers Amours faussez,
s'ensi vous en volez partir.
VII.
– Gasse, si fais quant je m'aïr.
tous est li gens cors oublïez
ma dame et ses vis colourez;
ja ne quier mais que j'en soupir.
VIII.
– Sire, moult a vilain loisir
fins amans haïs ou amez,
se il est d'Amours sourmenez,
s'il pour ce la veult relenquir.