I.
Gasse, par droit me respondez,
De vos le me couvient oïr,
Se je me sui abandonnez
Loiaument a amor servir,
Et cele me vueille traïr
A qui m'estoie abandonez.
Dites moi, lequel me loez,
Ou del atendre, ou del guerpir?
II.
– Sire, n'en sui pas esgarez,
De ce sai bien le mieus choisir:
Se finement de cuer amez,
Et loial sont vostre desir,
N'i a nïant del repentir,
Mais a vostre pooir servez;
Nuls n'iert ja tant d'amor grevez,
Qu'elle ne poist cent tans merir.
III.
– Qu'est ce, Gasse, estes vous desvez?
Me volez vos afolatir?
Ceste amor, que vous me loez,
Devroit touz li mondes haïr.
Touz jours amer, et puis morir!
Vilainement me confortez.
Quant je ai les maus endurez,
Lors en devroie bien joïr.
IV.
– Sire, por Dieu, or entendez.
A droit et raison maintenir,
Cuers qui bien est enamorez,
Coment puet il d'amor partir?
Nes que je puis blons devenir,
N'en poroit il estre tornez.
Se vos plest, de ce me creëz:
Qu'ami traï muerent martir.
V.
– Gasse, bien sai que vous pensez,
Mes amor lais a covenir;
Ne sui pas si amesurez,
Que je plus li vueille obeïr;
Ne poroie plus consentir
Ses felenesses cruautez,
Et vos qui goute n'i veëz,
Ne vos en savez revenir.
VI.
– Sire, onc mes puis que je fui nez,
Ne vos vi de riens esbahir;
Ou la raison ne m'escoutez,
Que le voir ne volez oïr.
Coment se puet avelenir
Fins cuers et loiaus volentez?
Laidement vers amor fausez,
S'einsi vos en volez partir.
VII.
– Gasse, si fais quant je m'aïr:
Touz est li gens cors oubliez,
Et ses dous vis fres colourez;
Ja ne quier mes que j'en sospir.
VIII.
– Sire, mout a vilain loisir
Fins amis haïz ou amez,
Se il est d'amors sormenez,
S'il por ce la veut relenquir.