I.
Douce dame, grez et graces vous rent,
Quant il vos plaist que je soie envoisiez;
Atendu ai vostre comandement,
Si chanterai por vos joianz et liez,
Et, s'il vos plaist, de moi merci aiez.
En tel guise vos en praigne pitiez
Qu'il ne vos poist se j'aim si hautement.
II.
Je sai de voir que resons me defent
Si haute amor se vos ne l'otroiez;
Maiz haut et bas sont d'un contenement,
Qu'amor les a a son talent jugiez;
Siens est li bas qui por li s'est hauciez,
Et siens li hauz qui s'en est abaissiez;
Qu'a son voloir les monte et les descent.
III.
Je ne di pas que nus aint bassement,
Puis que d'amor est sorpris et liiez,
Honorer doit la joie qu'il atent,
S'il estoit rois, et ele iert a ses piez.
Maiz je sui, las, sor toz autres puiez,
De hautement amer a mort jugiez;
Mes mout muert bel qui fait tel hardement.
IV.
Par Dieu, dame, l'amors de vos m'esprent,
Qui m'occira, se vos ne m'en aidiez.
El ne fait mes qu'a son comandement,
Si li ert bel se por li m'ociez.
Et s'endroit vous est vaincue pitiez,
Moie ert la perte, et vostres li pechiez,
Que dou partir de vous n'i a nient.
V.
Fine biauté plesant et cors tres gent
Vos dona Dieus, dont il soit merciez.
Nus ne porroit loer si finement
Voz granz valors con vos les mostreriez,
En touz bienfèz et en toz biens proisiez;
Et s'il vous plaist honorez n'essaussiez
N'iert ja a droit qui d'amor ne l'atent.
VI.
Chantez, Renaut, qui antan amïez;
Or m'est avis que vos en retraiez.
Se du partir estes appareilliez,
Ja onques Deus oan ne vos ament.
VII.
Par Dieu, Gilet, faus amanz desloiez,
Qui d'amor s'est partiz et esloigniez,
Vaut assez plus qu'uns autres enragiez;
Chastoiez en vos et l'autre dolent.