I.
Douce dame, grez et grasses vous rent,
quant il vous plaist que je soie envoisiez;
atendu ai vostre conmandement,
si chanterai pour vous joianz et liez,
et, s'il vous plaist, de moi merci aiez.
En tel guise vous en prende pitiez
qu'il ne vous poist, se j'aim si hautement.
II.
Je sai de voir que Raisons me desfent
si haute amour, se vous ne l'otroiez;
maiz haut et bas sunt d'un contenement,
puiz que les a a son talent jugiez;
suenz est li bas qui pour li s'est hauciez,
et suens li haus qui s'en est abaissiez;
a son voloir les monte et les descent.
III.
Je ne di pas que nus aint bassement,
puiz que d'amours est soupris et liiez,
hounourer doit sa joie qu'il atent,
se il iert rois, et ele iert a ses piez.
Maiz je sui, las, seur touz autres puiez,
de hautement amer a mort jugiez;
maiz molt muert bel qui fait tel hardement.
IV.
Par Dieu, dame, l'amours de vous m'esprent,
qui m'ocirra, se vous ne m'en aidiez.
ele ne fait qu'a son conmandement,
si li iert bel se pour li m'ociiez.
Et s'endroit vous est veincue pitiez,
moie iert la perte, et vostres li pechiez,
que dou partir de vous n'i a neient.
V.
Fine biautè plaisant et cors tres gent
vous dona Diex, dont il soit merciiez.
Nus ne porroit loer si finement
vos granz valors come vous moustriiez
en tous bons faiz et en touz biens prisiez;
et s'il vous plaist, honorez n'essaussiez
n'iert ja a droit qui d'Amours ne l'atent.
VI.
Chantez, Renaut, qui antan amiiez;
or m'est avis que vous en retraiez.
Se du partir estes appareilliez,
ja onques Dieux puiz jour ne vous ament.
VII.
Par Deu, Gilet, faux amanz desloiez,
qui d'amors s'est partiz et esloigniez,
vaut assez pis c'uns autres enragiez;
chastoiez en vous et l'autre dolant.