I.
De grant travail et de petit esploit
voi le siecle chargié et enconbré,
que tant sonmes plain de maleürté
que nus ne pense a fere ce q'il doit;
ainz avons si le Deable troussé
qu'a lui servir chascuns paine et essaie;
et Dieu, qui ot pour nos la cruël plaie,
avons mès tuit arriere dos bouté:
mult est hardiz qui pour mort ne s'esmaie.
II.
Deus, qui tout set et tout puet et tout voit,
nos avroit tost un entredeus geté,
se la Dame, plaine de grant bonté,
qui est lez lui, pour nous ne li prioit.
Si tres douz mot plesant et savoré
le grant coroz du grant Seigneur rapaie.
Mult par est fous qui autre amor essaie,
qu'en cesti n'a barat ne fausseté,
ne es autres ne merci ne manaie.
III.
La soriz qiert, por son cors garantir
contre l'iver, la noiz et le forment,
et nous, chetif! N'alons mès riens querant,
quant nos morrons, ou nos puissons guerir;
nous ne cerchons fors qu'Enfer le puant.
Ore esgardez q'une beste sauvage
porvoit de loing encontre son damage,
et nous n'avons ne sens ne escïent;
il m'est a vis que plain sonmes de rage.
IV.
Deables a geté pour nous sesir
quatre aimeçons aoschiez de torment:
Couvoitise lance premierement
et puis Orgueil pour sa grant roiz enplir;
Luxure va le batel trainant,
Felonie les gouverne et les nage.
Ensi peschant s'en viennent au rivage,
dont Deus nos gart par son conmandement,
en qui sainz fonz nous feïsmes honmage!
V.
Les preudonmes doit on tenir mult chiers
la ou il sont et servir et amer,
mès a paines en puet on nus trouver,
car il sont mès si com li faus deniers
que on ne puet en trebuchet verser,
ainz le gete on sanz coing et sanz balance;
torz et pechiez en eus fine et conmence.
faus tricheor, bien vous devroit menbrer
que Deus prendra de vos cruel venjance!
VI.
A la Dame qui touz les biens avance
t'en va, chanson! S'el te veut escouter,
onques ne fu nus de meillor cheance.