I.
Bien ait l'amor dont l'en cuide avoir joie
de bien amer et servir loiaument.
Més je n'atent fors la mort de la moie,
que j'ai enpris d'amer si hautement
et si n'i voi fors mon definement,
se ma dame de moi pitié ne prent
ou Loiautez et Amors ne l'en proie.
II.
S'il avenoit que si joene et si bloie,
de si haut pris amast si bassement,
esperance de garison avroie
de ma doleur et des max que je sent.
N'est pas ensi, ains est tout autrement:
car s'il avoit en moi valeurs tels cent,
si haute amor deservir ne porroie.
III.
En Amors a si haute seignorie
qu'ele a pouoir des povres enrichir.
Pour ce atent sa merci et s'aïe,
qu'el me puet fere en si haut point venir
que ja n'avront pouoir de moi nuisir
faus losengier qui pensent de traïr
loial amor; c'est lor ancesorie.
IV.
Douce dame, se j'ai dit par folie
nule chose dont max doie venir,
ce fet Amors, qui si estroit me lie
que n'ai pouoir de mon sens maintenir.
Dedenz son cors vueil ellire et choisir
me plus fin cuer por loiaument servir
dont onques fust haute heneur deservie.
V.
Deservir! Dex, qui porroit en sa vie
si haute enprise achever ne fornir?
Je ne di pas que ce soie je mie,
qu'Amors mi fet endurer et sentir
a ma dame les maus dont je souspir,
dont riens ne m'est medecine a guerir,
s'en bien amer ne recovroit m'amie.