I.
Las, por quoi m'entremis d'amer,
quant bien ne joie ne m'en vient?
espoir je me cuidai gaber:
foux est qui mauvés geu maintient.
Nus ne porroit pas deviser
la doulor qui au cuer me tient;
ha las, moi l'estuet endurer,
mout a en fere le couvient.
II.
Esperance m'a mout grevé,
ne sai conment m'en avendra.
Mout avrai lonc tens esperé,
ne sai quex la fins en sera.
tex me puet avoir en vilté,
espoir, qui oncor m'amera,
se Deu plest et sa grant bonté;
foux est qui s'esmaiera ja.
III.
Amors m'ont si pris et lïé
que je ne puis aillors penser,
et mon corage desvoié
que de li ne se puet torner.
Ne sai s'avra de moi pitié,
més ce me fet reconforter
que j'avrai ce qui m'est jugié:
ja ne savra tant demorer.
IV.
Amors m'ocit a mout grant tort,
si ne set a dire por quoi.
La nuit quant tout le mont se dort,
lors me muet et met en effroi,
ensi que joie ne deport
n'i truis, ne loiauté ne foi.
Morir me fet de dure mort
la riens el mont que je plus croi.
V.
Bien devroie cele haïr
por qui je sui en tel torment,
si m'en devroie bien partir,
tandis conme talent m'en prent.
Bien se puet cil por fol tenir
qui le bien voit et le mal prent,
qui de deus biens puet l'un choisir,
se il au meudre ne se prent.
VI.
Las, qu'ai je dit? or m'en repent.
Du departir ne doi parler,
ainz doi atendre longuement
a m'amie merci crïer,
tant que j'en face mon talent,
a qui qu'il en doie peser,
tout maugré la vilaine gent
qui Dex vueille mau jor doner.