I.
Grant pechié fait qui de chanter me prie,
car sanz raison n'est pas drois que je chant,
qu'onques ne fis chanson jour de ma vie,
se fine Amours nel m'enseigna avant.
Maiz pour leur gré chanterai sanz talant,
ausint com cil qui par acoustumance
fait tel chanson u n'a fors contenance.
II.
Je ne di pas c'amours se soit partie
de mon fin cuer, ja ne vive je tant!
Maiz losengier et felon et envie
m'ont trop mal fet, bien est apparissant;
sovent me font membrer en souspirant
c'ains Diex ne fist si cruel dessevrance
conme de joie et de douce acointance.
III.
Je sai de voir, se de loial amie
peüsse avoir de joie un bel samblant,
que j'ai un cuer qui de legier oublie
ire et travaill et fausse decevant
qui longuement m'a trové sanz guarant;
tolu m'avoit mon cuer par mescheance,
maiz rescous l'ai a painne et a grevance.
IV.
Car quant recort la douce conpaignie
et les deduis dont je sueil avoir tant,
donc n'a el mont chose si esbahie
conme est mes cuers que j'ai triste en pensant.
Donc pens et di que mal vive je tant
qu'Amours me vout alegier ma grevance,
et chascun jor double ma mesestance.
V.
Volage cuer et ondiere folie
ont maint anui fet a loial amant:
avoir cuidai joieuse conpaignie,
par lonc travaill, amoureuz desirrant;
maiz losengier par furent si poissant
qu'il m'ont tolu ma loial esperance
de la grant joie u j'avoie fiance.
VI.
Outrage ont fet orgueill et felenie
qui se sunt mis en la pluz avenant
qui onques fust a ami anemie,
et qui pluz a biauté douce et pleisant.
Merveilles faiz quant je vois ramembrant
ses granz valors u je n'ai maiz fiance,
n'en nul confort ne truis ma delivrance.