I.
Desconfortez, plains d'ire et de pesance,
ferai chanson contre le tens qui vient,
qu'a ma doleur n'a mestier alejance
se par chanter joie ne me revient.
tant a biautez cele pour qui me tient
li tres douz maus dont ja jor de ma vie
ne qier avoir ne confort ne aïe,
ne guerison
n'avrai ja se par li non,
car plus l'aim que je ne die.
II.
Mult a en li courtoisie et vaillance,
simple resgart qui trop bien li avient;
ses biaus parlers, sa simple contenance
me fet penser plus qu'a moi ne couvient.
Dex, que ferai? s'ele ne me retient
a son ami, trop iert mal conseille,
qu'ainz par autrui ne fu si bien servie
sanz traïson;
trop fera grant mesprison,
quant je l'aim, s'de m'oublie.
III.
Nus ne porroit contre sa mescheance
si biau servir que ja li vausist nient
més ja pour ce ne doit avoir doutance
fins cuers loiax qui bone amor maintient,
car loiautez le destraint tant q'il crient
a mesprendre envers sa douce amie;
ne je de ce ne me desconois mie,
ainz m'abandon
a fere sanz ochoison
quanqu'Amors conmande et prie.
IV.
– Douce dame, la plus bele de France –,
dire puis bien, – de moi ne vous souvient –,
car des l'eure que g'estoie en enfance,
li donai je mon cuer qu'ele tant tient,
si sai de voir qu'a morir me couvient,
s'el ne m'envoie du sien une partie;
se je l'avoie, je n'en morroie mie,
més guerison
avroie et trestout son bon
feroie et sa conmandie.
V.
Bele vaillans, doulce, cortoise et franche,
de qui valour nuit et jour me sovient,
alegiés moi pour Dieu la mesestance
que li miens cuers pour vostre amor soustient,
c'a vostre honour certes pas n'apartient
que vos faciés a nului vilonie,
et je vos sent de tele conpaignie,
de si douç non,
que j'arai mon guerredon,
s'en vos n'est pitiés faillie.
VI.
Por moi lo di, qui sui en tel balance
por la bele qui trop bel se maintient;
mi conpaignon, ou j'avoie fiance,
mi ont grevé, ne sai dont ce lor vient.
mult me mervoil de coi lor resovient,
n'en i at nul qui sor moi n'ait envie;
al moins font il pechié et vilonie,
que senz raison
Vont querant tel mesprison
par koi je perde m'amie.
VII.
Chanson, va t'en sanz nule demorance
as fins amanz, si leur di de par moi:
des mesdisanz vos envoit Dex venjance,
qui vos heent, si ne sevent pour quoi;
trop sont vilain et de mauvaise loi,
s'en prïerai Jhesus le filz Marie
Que tel mehaig leur envoit en l'oïe,
qu'el front en haut
soient seignié d'un fer chaut,
qu'i pere tonte lor vie.