I.
Bien cuidai toute ma vie
joie et chansons oblïer,
mais la contesse de Brie,
cui comant je n'os veer,
m'a conmandé a chanter,
si est bien drois que je die,
cant li plaist a conmander.
II.
Je di que c'est grans folie
d'esaier ne d'esprover
ne sa feme ne s'amie
tant con om la welt amer;
ains se doit om bien garder
d'enquerre par jalozie
ceu c'on n'i vodroit trover.
III.
Coment que je chant ne rie,
je deüsse melz plorer,
cant la miedre m'est faillie;
car, quant g'i veul muelz parler
et a li merci crier,
lors me dist par contrarie:
– cant ireis vos outre mer? –
IV.
Se elle est d'amors esprise,
malement li ait manbreit
conment j'ai a sa devise
sans nul contredit esté;
mais, espoir, ce m'a grevé,
c'on ne conoist boin servise
tant c'on ait autre esproveit.
V.
Aillors ait s'entente mise,
moi ait laissiet esgaré;
mais ja sa fiere contise
ne vanera ma lëauteit.
Jai tant ne m'avrait faceit,
que s'elle iert de .c. reprise,
si la prendroie j'a gré.
VI.
Bien deüsse avoir conquise
s'amor a ma volenteit,
por ceu ke j'ai sens faintixe
tous jors loiaulment ameit.
or ne m'ait pais an vilteit
por la fievre qui m'ait prise,
que j'en garai an esté.
VII.
Et sache bien de verté
que j'ai plus grant covoitise
de s'amor que de santeit.