I.
A la douçor de la bele seson,
que tote riens se reprent en verdor,
que sunt biau pré et vergier et buison,
et li oisel chantent desor la flor,
lors sui joianz quant tuit lessent amor,
qu'ami loial ne voi més se moi non;
seus vueil amer, et seus woil ceste honor.
II.
Mout m'ont grevé li trichëur felon,
més il ont droit, c'onques nes amai jor.
Lor deviner et lor fause acheson
fist ja cuidier que je fusse des lor.
Joie en perdi, si en crut ma dolor,
car ne mi soi garder de traison:
oncor en dot felon et traïtor.
III.
Entor tel gent ne me sai maintenir
qui tote honor lessent a lor pouoir;
tant con je m'aim les me couvient haïr,
ou je faudrai a ma grant joie avoir.
C'est grans ennuis que d'els amentevoir,
més tant les hé que ne m'en puis tenir;
ja lor mestier ne leront decheoir.
IV.
Or me dont Dex ma dame tant servir
qu'il aient duel de ma joie veoir;
bien me devroit vers li grant lieu tenir
ma loiauté qui ne puet remanoir.
Més je ne puis oncore apercevoir
qu'ele des biens me voille nus merir,
dont j'ai souffert les maus en bon espoir.
V.
Je n'en puis més, se ma dame consent
en ceste amor son home a engingnier,
car j'ai apris a amer loiaument,
ne ja nul jor repentir ne m'en quier,
si me devroit a son pouoir aidier
ce que je aim si amorosement,
n'autre ne puis ne amer ne proier.
VI.
Li quens Giefrois, qui me doit conseillier,
dit qu'il n'est pas amis entierement
qui nulle fois pense a amors lessier.