I.
Ab nou cor et ab nou talen
ab nou saber et ab nou sen
et ab nou bel captenemen
vuoill un bon nou vers commensar;
e qui mos bons nous motz enten
ben er plus nous a son viven
qu’us vieills en deu renovellar.
II.
Qu’ieu renovel mon ardimen
(qu’ai novel ab veil pessamen.)
Franc de novel ab ferm parven,
e chantem al novel temps clar
que·l novels fruitz naison desen
e·l novels critz on Jois s’empren
e·ill auzeill intron en amar.
III.
Domn’ am que me fai alegrar
qu’ieu am plus c’om non sap pensar
tant ben cum ieu am, ni comtar;
qu’ieu am la gensor ses conten —
Si Dieus m’am! — e no·i met cuidar
c’ad ops d’amar la·m saup triar
Amors quan nos ajostet gen.
IV.
D’Amor mi dei ieu ben lauzar
mais c’ad Amor guizerdonar
non puosc, qu’Amors m’a si·m ten car.
Da·t Amors per son chauzimen
mais qu’Amors non pot estojar
a sos ops, Amors, ni donar
ad autrui don ai cor rizen.
V.
Rire dei ieu si·m fatz soven
que·l cor mi ri neis en dormen,
e midonz ri·m tant dousamen
que ris de Dieu m’es vis, so·m par,
e si·m ten sos ris plus gauzen
que si·m rizion catre cen
angel que·m deurion gaug far.
VI.
Gaug ai ieu tal que mil dolen
seriont del mieu gaug manen,
e del mieu gaug tuich miei paren
viurion ab gaug ses manjar;
e qui vol gaug sai l’an queren,
qu’ieu ai tot gaug entieiramen
de midonz que ben lo·m pot dar.
VII.
Dompna, d’als non ai a parlar
mas de vos, dompna, que baisar
vos cuig, dompna, quand aug nomnar
vos, dompna, que ses vestimen
en mon cor, dompna, vos esgar;
c’ades mi·us veig inz dompn’ estar
vostre bel nou cors covinen.
VIII.
De mon nou vers vuoill totz pregar
que·l m’anon de novel chantar
a lieis c’am senes talan var.
Dieus m’abais, et Amors, s’ieu men;
c’autre ris mi semblon plorar,
si·m ten ferm en gaug ses laissar
midonz, c’autre drut non cossen.
IX.
Ja Dieus mais dompna no·m presen,
sol gart ma dompn’ e Mon Joglar!
X.
Dieus gart ma domna e Mon Joglar
e ja mais dompna no·m presen.