I.
A la douçor du tens qui raverdoie
chantent oisel et florissent vergier;
mes je ne sai dont resjoïr me doie,
quant a merci fail quant je plus la qier;
je chanterai sanz joie et sanz proier,
que ma mort voi, ne faillir n'i porroie,
puis qu'amors veut que contre moi la croie.
II.
Dex! qu'a amors, qui touz les siens gerroie,
ceus qu'ele puet grever ne mestroier?
Li biax senblans qu'en ma dame trouvoie
m'a trop grevé, n'ainc ne m'i vout aidier;
cele m'i fu cruels a l'acointier;
je sai de voir qu'a son tort me mestroie,
si me couvient qu'a sa volenté soie.
III.
Puis qu'ensi est qu'a li ne puis contendre,
ou vueille ou non, servir la me couvient.
Qui cuide avoir grant joie sanz atendre
bien doit souffrir, mes cil qui faillir crient
est si destroiz quant secors ne li vient;
mes je ne puis moi ne mon cuer deffendre
de plus amer qu'amors ne me veut rendre.
IV.
Grant pechié fet qui son honme veut prendre
par biau senblant moustrer tant q'il le tient.
Ensi me fist ma dame a li entendre
dont or me fet tel cuidier, se devient,
qui en veillant faut et en dormant vient;
s'en nest l'amor et croist, qui ja n'iert mendre.
Dont el me fet et flanber et esprendre.
V.
Je ne tieng pas l'amor a droit partie,
dont il couvient morir en trop amer;
si me couvient que chant et gieu et rie
et faz senblant de ma joie cuidier.
ma dame dit qu'ensi doi endurer:
muire esperanz en atente d'aïe
– morir en cuit, mes ne sai que g'en die. –
VI.
Dame, valour, beauté et cortoisie
a tant en vos c'on n'i set qu'amender;
s'avuec ces biens acuilliez felonie
par achoison de vostre ami grever,
vostre fin cuer en ferïez blasmer,
que vostres sui en vostre seignorie,
en vostre amor, qui donra mort ou vie.
VII.
Li cuens de Blois devroit bien mercïer
force d'amour, qui li dona amie:
amer pot il, mes il n'en morut mie.