I.
Dame, merci! se j'aing trop hautement,
ne me voeilliez pour ma folour grever.
Merci vous proi et si faitierement
qu'il ne vous poist se je vous voeil amer,
que au souvenir me puis tant deliter
en vo gent cors, ou il n'a qu'amender,
car dieus le fist sur tous autres plus gent.
II.
Hai!, amours, com savez sagement
ceus que voulez a vos part atorner,
que avant faites a leur iex un presant
qu'il ne leur puet a leur cuer trestorner!
Ainsi me seut amours enbriconner
que pour ma mort m'a fait adés penser
la ou valours et raisons me desfant.
III.
Raison me dit et raison me consent
que vous doie, douce dame, honnorer;
mais vos biautez qui m'atisse et esprent
est la raison qui bien me puet grever,
car n'est pas drois que doiez avaler
vostre haut pris pour moi tant alever,
se par pitié raison ne le consent.
IV.
Se vrais amis puet nul recouvrement
en gentil cuer pour loiauté trouver,
dont ne doit pas amours son jugement
desloiaument encontre moi fausser,
qu'elle doit bien par tout droit delivrer
ceus qu'elle voit pour li enbriconner,
quant mis i sont par son esforcement.
V.
Certes, dame, se j'ain trop folement,
nulz ne m'en doit les coupes demender,
que amours de moi fet si a son talent
que ne me puis de riens amesurer,
car li delit de joie desirrer
me donne adés, et si me fait penser
tant que j'en sui hors de mon ensïent.