I.
Quant je voi la noif remise
Qui les oissillons destraint,
Que la glace fraint et brise,
La ou li soleus l'ataint,
Lors ai corage que chant,
Quant cele le me devise
Qui de moi fet son talant;
N'ai pooir que je m'en faigne.
II.
L'amor est de fole guise
Qui por grant paine remaint;
Cele qui s'est en moi mise
Ne cuit pas que ce m'ensaint;
Si ai je dolor mout grant,
Mes je l'ai de loing aprise:
Si sofrerai en avant
Tant qu'amors faille et remaigne.
III.
Bone Amor fine et veraie
Servirai tot mon aé;
N'est droiz que je m'en retraie,
Quant toz jors i ai pensé.
Tant sui a sa volenté
Que, se joie m'en delaie,
Mieus vueil je morir por lé
Que je ja d'Amor me plaigne.
IV.
Nule rienz ne m'en esmaie,
Fors son sens et sa beauté,
Que s'Amors ne la ressaie,
Ja n'en croirai la verté,
Coment ele m'a grevé;
Mes tant que les biens en aie
Les maus prendrai en bon gré;
S'il li plet, si m'en destraigne.
V.
Dame, en la vostre baillie
Mon cuer et mon cors otroi:
Por Dieu, ne m'ociez mie,
Prenez en hastif conroi,
Je nel di mie por moi:
Mes ce seroit felonie,
Qu'a vostre home devez foi:
Pour Dieu, pitiez vos en praigne.
VI.
Fous est qui d'amor chastie,
Car bien set chascuns de soi,
Orgueus contre seignorie
Ne vaut riens, ne fol desroi:
Por ce l'aim en bone foi,
Ma dame, qui m'iert amie,
Se li plet, que je mieus croi
Qu'atendue de Bretaigne.
VII.
Odin, s'ele ne m'aïe,
Puisque je tant l'aim et croi,
Voir est qu'a morir m'ensaingne.