Huet

Versione stampabilePDF version

I.
Je ne puis pas si loing foïr
Que ma dame puisse oublier,
N'el ne me daigne retenir,
Ne je ne sai quel part aler
Entre mon cuer et mon desir
Et meseürs et trop amer;
Et ce que ne li poi celer,
M'a mort, si ne puis plus sofrir.
 
II.
D'amours se feïst bon partir,
Mes nus ne s'en puet consirer,
Fors cil qui essaucent mentir
Ne de voir ne quierent parler,
Et si nel puent meintenir;
Ja Deus nes en lest amender!
Tant m'ont fait d'ennui endurer
Que n'ai mes pooir de morir.
 
III.
Et se je mes doi joie avoir,
Amours, qu'alez vous atendant,
Quant vers vous fais tout mon povoir
En guise de loial amant?
Voulez vous fere apercevoir
Que cil sont fol qui aiment tant?
Vostre anemi en sont joiant,
Si nel deüssiez pas vouloir.
 
IV.
De moi puis merveilles veoir,
Qu'einsi m'ocist a mon talant
Cele qui me dut dire voir
De sa bele bouche riant.
Mes encor i ai bon espoir,
Si atendrai merci proiant,
Quant je n'ai contre li garant,
Ne d'Amours ne me quier mouvoir.
 
V.
Bien est voirs qu'amours me desfent
Joie et deport et gieu et ris;
S'ele en ce se tient longement,
N'en puis mes se je m'esbahis;
Qu'adès dient la male gent:
Plus est fous qui plus est amis;
Mais ne l'ai pas einsi apris:
Du repentir n'i a niënt.
 
VI.
Mal m'ont fet a mon escïent
Ma dame et amours qui m'ont pris.
S'ele est de dous acointement
Et ele a gent cors et cler vis,
Qu'en tient a moi de niënt?
Ja n'en deüsse estre pensis.
Et qu'est ce, Deus, que je devis?
Ja nus n'amera sagement.
 
VII.
Amours, a vous je me dement,
Qui me menastes u païs
Ou j'ai mon cuer en tel lieu mis
Dont je morrai s'on le me rent.