I.
Desconfortez, plains de dolour et d'ire,
M'estuet chanter, qu'aillors n'ai ou entende.
Tout le mont voi, fors moi, joer et rire,
Ne je ne truis qui d'ennui me defende.
Cele m'ocit cui mes cuers plus desire,
S'en sui iriez, quant ele ne l'amende.
Chascuns dit qu'il aime autresi,
Por ce ne conoist on ami.
II.
Ele ne set mon duel ne mon martire,
Por ce m'estuet que sa merci atende;
Touz faus amanz par qui ma joie empire
Pri je a Dieu qu'en enfer les descende.
J'aim, fet chascuns: grant loisir ont dou dire,
Mais pou en voi qui a amors s'entende.
Chascuns, etc.
III.
De moi grever est amors costumiere;
Si me fait bien por coi de li me plaingne;
Mes a soufrir m'est la peine legiere,
Se ce li plet que a amer m'ensaingne.
Mes cuers me dit que souvent la requiere,
Si m'est noaus quant el plus me desdaigne.
Chascuns, etc.
IV.
Onques ne fis vers li fausse proiere,
Car je nel sai ne ja ne le m'apraingne:
La moie amors n'est mie noveliere,
Qu'il n'est fors li nule ou mes cuers remaingne.
Se plus n'i prent, l'angoisse en ai mout chiere,
Puis qu'il li plait qu'el ensi me destraigne.
Chascuns, etc.
V.
Cil n'aime pas qui s'en cuide retraire
Se il i voit ce qu'a merci n'aviegne;
Par Dieu, seignor, de ce ne me puis taire:
Mieus aim morir que pis m'en mesaviegne.
Car tuit li mal que j'ai me doivent plaire
Tant que ma dame en joie me maintiengne.
Chascuns, etc.
VI.
Conseilliez moi, dame, quil poëz faire;
S'ensi me muir ne sai mes qui me tiegne
A bone amor, dont li miens cuers s'esclaire,
Quant je vos voi, se joie m'en aviegne.
Mout me merveil qu'en franc cuer debonere
Poëz penser rien dont je morir criegne.
Chascuns, etc.
VII.
Douce dame por Dieu vos pri
Que je n'aie du tot failli!
VIII.
Gasçozes a son chant defeni,
Qui toz jors aime et n'a merci.