| I | |
| Chancon ferai car ta lent men est pris; de la meil lor qui soit entot le mont. dela meillor. ie cuit que iai mespris. cele fust tex se dex ioie me doint. de moi li fust aucune pitiez prise. q(ui) sui touz siens (et) sui asa deuise. pitiez de cuer dex quel ne cest assise. en sa biaute. dame q(ui) merci proi. ie sent les max damer por uos. sentez les uos por moi. |
Chançon ferai, car talent m’en est pris, de la meillor qui soit en tot le mont. De la meillor? Je cuit que j’ai mespris. C’ele fust tex, se Dex joie me doint, de moi li fust aucune pitiez prise, qui sui touz siens et sui a sa devise. Pitiez de cuer, Dex! Qu’el ne c’est assise en sa biauté? Dame, qui merci proi, je sent les max d’amer por vos. Sentez les vos por moi? |
| II | |
| Douce dame sanz amor fui iadis. quant ie choisi u(ost)re gente facon. (et) quant ie ui u(ost)re tres biau cler uis. sime raprist mes cuers autre rai son. de uos amer me semo(n)t (et) iustise. auos en est au(ost)re comandise. li cors remaint qui sent felon iuise. se nen auez merci de u(ost)re gre. li douz max dont ia tent ioie. mo(n)t sigreue mort sui cele mi de laie:. |
Douce dame, sanz amor fui jadis quant je choisi vostre gente façon; et quant je vi vostre tres biau cler vis, si me raprist mes cuers autre raison. De vos amer me semont et justise, a vos en est a vostre comandise. Li cors remaint, qui sent felon juïse, se n’en avez merci de vostre gré. Li douz max dont j’atent joie m’ont si grevé, mort sui, c’ele m’i delaie. |
| III | |
| Mout a amors grant force (et) grant pooir. qui sanz raiso(n) fait choisir a son gre. sanz raison dex ie ne di pas sauoir. car ames euz en set mon cuer bon gre. qui choisirent sitres bele semblance. dont iames ior ne ferai desseura(n)ce. ains soufrerai por li grief pe nitance. tant que pitiez et merci lenprendra. dirai uos qui mon fin cuer enble ma. li douz ris (et) li bel oeil quele a. |
Mout a Amors grant force et grant pooir, qui sanz raison fait choisir a son gré. Sanz raison? Dex! Je ne di pas savoir, car a mes euz en set mon cuer bon gré, qui choisirent sitres bele semblance, dont jamés jor ne ferai dessevrance, ains soufrerai por li grief penitance, tant que pitiez et merci l’en prendra. Dirai vos qui mon fin cuer enblé m’a? Li douz ris et li bel oeil qu’ele a. |
| IV | |
| Douce dame sil uos plaisoit un soir. mauriez uos plus de ioie done. conques tristan qui en fist son pooir. nen pot auoir nul ior de son ae. la moie ioie est tornee apesance. he cors sans cuer de uos fait grant ueniance. cele qui ma naure sanz deffiance. et ne por quant ie ne la lairai ia. len doit bien bele dame amer. et samor garder cil qui la. |
Douce dame, s’il vos plaisoit un soir, m’avrïez vos plus de joie doné. C’onques Tristan, qui en fist son pooir, n’en pot avoir nul jor de son aé; la moie joie est tornee a pesance. Hé! Cors sans cuer! De vos fait grant venjance cele qui m’a navré sanz deffiance; et neporquant je ne la lairai ja. L’en doit bien bele dame amer et s’amor garder, cil qui l’a. |
| V | |
| Dame por uos uueill aler foloiant. que ie en aim mes maus (et) ma dolor. quapres les max ma grant ioie en atent. que gen aurai se dieu plaist abrief ior. amors mer ci ne soies oubliee. sor me fail lies siert traison doublee. que mes grans max por uos si fort ma gree. ne metez longue ment en oubli. sela bele n]a[\e/ \a/ de moi merci. ie ne uiurai mie longuement ensi. |
Dame, por vos vueill aler foloiant, que je en aim mes maus et ma dolor qu’aprés les max ma grant joie en atent que g’en avrai, se Dieu plaist, a brief jor. Amors, merci! Ne soies oubliee! S’or me faillies s’iert traison doublee, que mes grans max por vos si fort m’agree. Ne metez longuement en oubli. Se la bele ne a de moi merci, je ne vivrai mie longuement ensi. |
| VI | |
| Sa grant biautez qui mes prent et agree; qui seur tou tes est la plus desirree. ma si lacie mon cuer en sa prison. dex ie ne pens sali non. amoi que ne pense ele donc. |
Sa grant biautez qui m’esprent et agree, qui seur toutes est la plus desirree, m’a si lacié mon cuer en sa prison. Dex, je ne pens s’a li non. A moi que ne pense ele donc? |