| I | |
| Tuit mi desir. et tuit mi grief torment. uiene(n)t de la. ou sont tuit mi penser. g(ra)nt paour ai por ce que toute gent. qui ont ueu. son gent cors aces me. mont. si seurpriz de bonne uolente. neiz diex laime iel sai a escient. grant merueille est. que il en seuffre tant |
Tuit mi desir et tuit mi grief torment vienent de la ou sont tuit mi penser. Grant paour ai, por ce que toute gent qui ont veü son gent cors acesmé m’ont si seurpriz de bonne volenté. Neiz Diex l’aime, jel sai a escïent; grant merveille est, que il en seuffre tant. |
| II | |
| Touz mesba hiz sou uent en merueillant. ou diex tro ua. si est(ra)nge biaute. q(ua)nt il la mist ca ius | entre la gent. mout nous en fist grant debonnerete. car tot le mont. nous a enlumine. de sa ualeur sont tuit li b(ie)n. si g(ra)nt. nus ne lauoit qui ne len die autant. |
Touz m’esbahiz souvent en merveillant ou Diex trova si estrange biauté; quant il la mist ça jus entre la gent, mout nous en fist grant debonnereté. Car tot le mont nous a enluminé, de sa valeur sont tuit li bien si grant; nus ne la voit qui ne l’en die autant. |
| III | |
| Souuiegne uous dame du douz acueil. que ie ai fet par si g(ra)nt de sirrier. que norent pas tant de po oir mi oeul. que ie uers uous. les ousasse lancier. de ma bou che ne uous ose prier. ne pour dire dame ce que ie uueil. tant sui couars las chetis. or men duei |
Souviegne vous, dame, du douz acueil que je ai fet par si grant desirrier, que n’orent pas tant de pooir mi oeul que je vers vous les ousasse lancier; de ma bouche ne vous ose prier, ne pour dire, dame, ce que je vueil; tant sui couars, las, chetis! Or m’en dueil. |
| IV | |
| Bonne auenture. auiegne fol espoir. qui les amanz. fet uiure (et) resioir. des esperance. fet languir (et) douloir. (et) mes fox. cuers pe(n)se ades. aguerir. sil fust sages il me feist morir. en trop g(ra)nt se(n)z puet il b(ie)n meschoisir. |
Bonne aventure aviegne fol espoir, qui les amanz fet vivre et resjoïr! Desesperance fet languir et douloir, et mes fox cuers pense adés a guerir, s’il fust sages, il me feïst morir. En trop grant senz puet il bien meschoisir. |
| V | |
| Chanson uatent droit araol noncier.que serue amors (et) fa ce bel acueil. (et) chant souuent (con) me. oiselet. seur brueil |
Chanson, va t’ent droit a Raol noncier que serve Amors et face bel acueil et chant souvent conme oiselet seur brueil. |