I.
Quant je voi le douz tens venir,
que faut nois et gelee,
et j'oi ces oisellons tentir
el bois soz la ramee,
lors me fet ma dame sentir
un mal dont ja ne qier garir,
ne j a n'en avrai mee
entres q'il li viengne a plaisir
qu'el m'ait joie donee.
II.
Ha, Dex, car mi fetes morir,
quant n'ai ce qui m'agree.
mort, pren moi, plus nel puis sosfrir
ne l'ai je esgardee.
Encor vueil je qu'a son plesir
mi face ma dame languir
se ma mort a juree;
mors sui, s'ensi se veut tenir
que longuement me hee.
III.
Douce dame, or vous voil proier
que de rien que je die
ne vous daigniez ja corrocier,
més tenez a folie.
Par biau senblant sanz otroier
me poez ma vie aloignier,
si ne m'ocirroiz mie:
n'avez honor ou guerroier
ce dont estes saisie.