I.
Contre tanz que voi frimer
les arbres et blanchoier,
m'est pris talenz de chanter
si n'en eüsse mestier;
qu'Amours me fet comperer
ce c'onques ne seu trichier,
n'onques ne peu endurer
a avoir faus cuer legier,
pour ç'ai failli a amie.
II.
Mout par me seut bien grever
ce qui me deüst aidier:
ce est loiaument amer;
qu'ailleurs ne me soi vengier.
Dieus le me laist oublïer
pour estre hors de dangier!
neporquant, bien doi trover
folie quant je la quier.
ha! las, folours n'est ce mie.
III.
A tort m'ocïez, Dolour,
que point n'en deüsse avoir,
maiz ciaus qui trichent Amour
et servent pour decevoir.
De tant m'a Diex fet honour,
dont bon gré li doi savoir,
c'ainc ne vi hore de jour
que ne me feïst doloir
ma douce dame anemie.
IV.
Dame, pour le Creatour
creez moi, je vous di voir,
qu'en moi n'a tant de vigour
que le vous face savoir.
Au cuer en souspir et plour;
maiz ne vous daigne chaloir;
mieus me venist que valour
faussist, quant l'alai veoir,
et biautez et cortoisie.
V.
Ha! las, je pri et reblant
ce qui me fera morir;
qu'Amours n'aloit el querant
maiz que me peüst trahir;
mal bailli sont li amant
qu'en sa merci puet tenir!
de moi ne voi nul samblant
conment e m'en puisse issir
se pitiez ne m'en deslie.
VI.
Amours veut tout son talent
de moi grever acomplir.
grant merveille est que j'aim tant
es maus que m'estuet soufrir.
A li m'otroi et conmant,
quar bien le me puet merir;
hons qui aime en repentant
n'em puet pas au loins joïr,
se d'eür n'a grant aïe.
VII.
A Guiot de Ponceaus mant
ke nus ne puet trop servir;
pour Dieu, k'il ne s'esmait mie.
VIII.
Gasses define son chant
ki tos jors velt maintenir
boenne amor sans trecherie.