I.
Amours qui a son oés m'a pris
me fait envoisier et chanter
pour vos, dame, ou j'ai mon cuer mis,
dont je ne[l] puis ne quier oster,
ainz vos vuil servir et amer
de cuer loial entier, sanz tricherie,
que d'autre amour n'ai talant ne envie,
et Dex me doint [tant] faire et tant valoir
que vos vuilliez de moi merci avoir,
car en vos est ou ma mort ou ma vie.
II.
Dame, vos m'avez si conquis
que je ne puis aillors penser
et j'ai si lëaument empris
de vos servir et honorer
que ja ne m'i verroiz fauser.
Mon cuer avez tot an vostre baillie,
s'avez sor moi pooir et seignorie,
ne ja més jor n'avrai autre voloir,
ainz servirai de cuer en bon espoir
vos et Amours qui s'est de moi saisie.
III.
Se de vos amer sui sopris,
qu'en puis je, quant j'oi tant loer
vostre grant beauté, vostre pris,
vostre sen, vostre bel parler,
vostre semblant, vostre acesmer,
vostre valour et vostre cortoisie;
vostre cors gent, que mes fins cuers n'oblie,
me fait sovent sopirer et doloir,
et tant vos dout et ain sanz decevoir
que mar vos vi, se de vos n'ai aïe.
IV.
Dame, onques mon cuer ne vos dis,
et toz jors le vos cuit celer,
et s'ai je aucune foiz empris
que je[l] vos cuidoie mostrer;
més quant j'en vuil a vos parler,
li sens me faut, la parole me lie,
je n'ai pooir que nule rien vos die,
si ne voi pas con le puissiez savoir,
se vostres sens ne vos fait parcevoir
la bone amour qui est en moi norrie.
V.
Sovant sui iriez et pensis
quant je ne puis a vos parler:
por felons de vostre païs
n'os venir vers vos ne aler.
Ainsi me covient endurer
grief mal por vos, et si nou savez mie;
més je vuil bien que ma chansons vous die
que bien poëz conoistre et parcevoir
a mon semblant quant je vos puis veoir
que plus vos ain que rien qui soit en vie.
VI.
Douce dame, cui n'os nommer amie,
des que je n'ai hardement ne pooir
de vos mostrer mon mal et mon voloir
en lieu de moi ceste chansons vos prie.
VII.
D'un Chastelain vuil que ma chansons die,
Huon, qu'il pant d'amer et de valoir
et esloignier touz cés a son pooir
qui sont vilain et ploin de felonie.