I.
Tant de solas come j'ai pour chanter,
Dame, m'estuet et guerpir et laissier;
Quant je ne puis en vos merci trover,
Trop covendra ma chançons empirier;
Por ce le les, que joie m'est faillie
Quant en vos n'ai atente ne fïance,
Ne ja d'aillors ne quier avoir aïe:
Tot ai perdu, confort et esperance.
II.
Ce me par fet du tot desconforter
Qu'aillors ne puis si grant amor changier
Dont je ne poi mon corage celer
Vers vos, dame, cui je n'os mes priier,
Qu'orgueils a ja mainte beauté traïe;
Por vos en ai sovent ire et pesance;
Mais, se Dieu plest, vos n'avrez ja envie
De ce voloir qui toz biens desavance.
III.
Dame, de vos ne me sai ou clamer,
Car sens amor nus ne m'en puet aidier;
Por ce m'estuet plus et plus comparer
Vos granz valors que mar soi acointier.
Vostre beauté et vostre cortoisie, –
Dont m'ocïez, – vos et ma mescheance,
Ont si de moi tote joie partie
Qu'en ire vif, ja n'en avrai legeance.
IV.
Com escilliez doit folement parler
Cil cui Amors puet si desconseillier
Com el fet moi, qui ne m'i soi garder;
Si croi ma mort quant ma volenté quier;
Je nel di pas, dame, par felonie;
Mais hom destroiz est toz jors en errance;
Si par vueil la vostre compaignie
Que li desirs doble ma mesestance.
V.
Dieus, qui poroit si grant amour porter,
Qui toz jors croist et sens apeticier
Par mon fin cuer, qui ne puet oblier,
Ce que trop vuet, ce ne li a mestier.
Ne fes pas sens, ne je n'i voi folie,
Qu'a force vuet cele ou je n'ai puissance.
Tant a sor moi Amors grant seignorie
Que me destruit reson et abstenance.
VI.
Ha! cuens de Blois, Amors est mal baillie
S'ele m'ocit, qu'au roiaume de France
Ne sera mes si leaument servie,
Neïs par vos; car je l'apris d'enfance.