I.
Tant de soulaz com je ai pour chanter,
dame, m'estuet et guerpir et laissier;
quant je ne puis en vous merci trouver,
il convendra ma chanson empirier.
Pour ce le lais que joie m'est faillie
quant en vous n'ai atente ne fïance,
ne ja d'ailleurs ne quier avoir aïe:
tout ai perdu, confort et esperance.
II.
Dame, de vous ne me sai u clamer,
quar sanz amours ne m'en puet nus vengier;
pour ce m'estuet pluz et pluz comparer
vo grant valour que mal seu acointier.
Vostre beauté et vostre cortoisie,
dont m'ocïez, et ma granz meschëance
a si de moi toute joie partie
que vivre n'aim, dont ja n'avrai poissance.
III.
Com escilliez doit folement parler
cil qui amours puet si desconseillier
com el fait moi, qui ne m'i soi guarder;
si croi ma mort quant ma volenté quier.
Je nel di pas, dame, par felenie,
maiz hom destrois est touz jours en balance,
et si aim tant la vostre compaignie
que li desirs double ma mesestance.
IV.
Dex, qui porroit si grant amour porter,
qui touz jours croist et sanz apeticier
par mon fin cuer, qui ne puet oublïer
ce que trop veut, si ne m'eüst mestier?
Je n'i fais sens ne je n'i voi folie:
pour ce nasqui cele u je n'ai poissance;
tant a en li biauté et courtoisie
que me destruit raisons et abstinance.
V.
Ce ne par fait du tout desconforter
qu'ailleurs ne puis si grant amor changier,
dont je ne poi mon corage celer
vers vous, dame, que je n'os mes proier.
Orgeuz a ja mainte biauté trahie:
pour vous en ai souvent ire et pesance;
mes, se Dieu plaist, vous n'avroiz ja envie
de cel voloir qui touz bienz desavance.
VI.
Ha! cuens de Blois, amours est mal baillie
s'ele m'ocit, qu'el roiame de France
ne sara maiz si loiaument servie,
neïs de vous quar je l'apris d'enfance.