![Versione stampabile Versione stampabile](https://letteraturaeuropea.let.uniroma1.it/sites/all/modules/print/icons/print_icon.gif)
![PDF version PDF version](https://letteraturaeuropea.let.uniroma1.it/sites/all/modules/print/icons/pdf_icon.gif)
I.
Quant voi la flor botonner,
Qu'esclarcissent rivage,
Et j'oi l'aloe chanter
Du tens qui rassoage,
Las! ne me puis conforter,
Qu'Amours vuet moi damage;
A celi me fet penser
Qui me tieit a outrage.
Ha! fins amis
Morrai, ce m'est vis.
Ja voir n'en partirai vis:
Trop m'a soupris.
II.
Ma mort pris en esgarder
Son cors et son visage;
Ne m'en poi amesurer:
Trop en crui mon courage,
Mes por Deu de li amer
Nel me tieigne a folage,
Qu'a s'amor faire oblier
Seroient fol li sage.
Ha! si m'a pris!
Siens serai toz dis.
Ja voir etc.
III.
Je n'oi pooir contre Amor,
Puis qu'en moi se fu mise;
Car ma joie et ma dolor
Est toute a sa devise;
Ja sens li n'avrai nul jor
Ce qui plus me justise;
Qui quel me tiegne a folor,
Je ferai son servise.
Ha! jel me quis
Ce dont muir pensis.
Ja voir etc.
IV.
De c'est ma graindre paor
Que ma dame ont assise
Losengier et menteor
Et gent de male guise.
Mes pou dot losengeor:
S'el s'en ert entremise
Tost les avroit mis el tour
Et moi hors de juïse.
Ha! pour quel dis?
Ainz m'avra ocis.
Ja voir etc.
V.
Guillot, le Conte me di
(Et si le me salue)
Qu'il aint et serve en merci
Ou sa paine a perdue;
Qu'Amors n'a mes nul ami,
Se ses cuers se remue,
Fors moi qu'a son oes choisi
Quant ma dame oi veüe.
Ha! si bien fis,
Quant mon cuer i mis!
Ja voir etc.
VI.
Guillot, beaus amis, di li,
S'ert ma joie creüe,
Q'il m'est, puis que je nel vi,
Tel honors avenue,
Qu'en un lit, ou m'endormi,
Ai ma dame veüe.
Bien met pitié en obli
Qui tel dormir remue!
Ha! en son vis
Choisi un dous ris!
Ja voir etc.
VII.
Ha! enemis
A en son païs
Gasses, qui est fins amis,
Et iert toz dis.