I.
Ne puis faillir a bone chanson faire
quant ma dame me prie que je chant.
S'ele me fust tant franche et debonaire
con je sui li, bien porroie mon chant
fere meilleur, s'en seroit melz amez.
Més por itant m'en sui reconfortez,
que nus biens n'est d'Amors trop desirez.
II.
Ma volenté ne puis couvrir ne taire,
ne le desir qui par mon cors s'espant;
ce m'est avis qu'a toutes genz doit plaire:
ausi cuident li autre fin amant.
Las! trop en sui destroiz et enbrasez,
més fine amor et bone volentez
fet les amanz souvent desmesurez.
III.
Ma volenté est si fiere et hardie
qu'a toutes genz vueil descouvrir m'amor
et la biauté dont j'ai si grant envie
que je n'i fin de penser nuit et jor.
Uns douz besiers me fu si savorez
que je ne sai se mes cuers m'est enblez,
més contre moi s'en est en li entrez.
IV.
Douce dame, de touz biens enseignie,
simple et plesant, plaine de grant douçor,
alegiez moi par vostre cortoisie
les maus que trai por vos et la dolor.
De vo biauté fui l'autrier si navrez
qu'encor en sui en moi si trespensez
que morir cuit, se pitié n'en avez.
V.
Douce dame, por vostre signorie,
por vostre prix et por vostre valor,
se vos ameis ne pou ne bien ma vie,
vers vo bouche m'estuet reprendre un tour.
Ensi vos pri ke mon cuer me rendeis:
valoir m'i doit ma bone volenteis
et cortoixie et fois et loiaulteis.