| De bone amour vient seance et biautez et de ces II vient bone amour autreci. Li III sont I, que ie bien i ai pensé, ia a nul iour ne m’ seront departi. Par I conseil cont ensanble establi li coreour, qui denant sont alé: de mon cuer ont fet leur chemin ferré, ia a nul iour n’en seront departi. |
| Li coreour sont la nuit en clarté et le iour sont pour la gent ocurri: li dous resgars plaisans et savouré, la grant biauté et le sans que g’i vi; n’est merveilles se ie m’en esbahi. De li a Dieus le siecle enluminé, car qui avroit le plus biau iour d’esté, verz lui seroit ocur en plain midi. |
| En amour a pronesse et hardement: li dui sont troi et du tiers sont li dui et bone amour sont at eus apendans, ou amours a et reget et refuit. Pour c’est amaours li ospitaus d’autrui que nus n’i faut selont son avenant. Et i ai failli, dame qui valez tant, a vostre ostel, si ne sai ou ie sui. |
| Or n’i a plus fors qu’a lui me conmant que touz bien fez ai laissez pour celui: ma li bele iue ou ma mort i atant, ne sai que c’est, mes quant denant lui fui. Ne me firent si oil point d’annui, ains me vindrent ferir de maintenant par mi le cors d’un amoureus sanblant encor i est li cos que g’i recui. |
| Li cos fu granz, il ne fet qu’enpirier, ne nus myres ne le pourroit saner se celle non qui le dart fist lancier. Se de sa main mi daignoit adeser, tost en porroit le cop mortel oster o tout le fust, dont i’ai grant desirrer; mès la pointe de fer n’en puet sachier, qu’ele brisa dedens au cop doner. |