| En chantant uoel ma dolour descouurir quant perdu ai ce ke plus desiroie. las si nesai ke puis se deuenir. ke ma mors est ce dont jespoire ioie. si mestoura a tel dolour languir. quant ie ne puis ne ueoir ne oir. la bele riens a cui ie matendoie. |
| En chantant voel ma doulour descouvrir, quant perdu ai ce ke plus desiroie, las! si ne sai ke puisse devenir, ke ma mors* est ce dont i'espoire ioie, si m'estoura a te dolour languir, quant ie ne puis ne veoir ne oir, la bele riens a cui ie m'atendoie. |
| Quant mensouuient grief en sont li souspir. (et) cest tous iours ne ia ne re kerroie. pour li mestuet mainte gent obeir. car ie nesai se nus ua cele uoie. mais se nus puet aboine amour uenir. par bien amer et loiaument ser uir. je sai deuoir kencor en arai ioie. |
| Quant m'en souvient, grief en sont li souspir, et cest tous iours ne ia ne rekerroie, pour li m'estuet mainte gent obeir, car ie ne sai se nus va cele voie, mais se nus puet a boine amour venir, par bien amer et loiaument servir, ie sai de voir k'encor en arai ioie. |
| Mi chant sont tout plain dire (et) de dolour. pour uous dame ke ie ai tant amee. ke ie nesai se ie chant u ie plour. ensi mestuet souffrir ma destinee. mais se dieu plaist en cor uerrai le iour. kamours sera cangie en autre tour. si uous donra uers moi millour pensee. |
| Mi chant sont tout plain d'ire et de dolour, pour vous dame ke ie ai tant amee, ke ie ne sai se ie chant u ie plour, ensi m'estuet souffrir ma destinee, mais se dieu plaist encor verrai le iour, k'amours sera cangie en autre tour, si vos donra vers moi millour pensee. |
| Souuiegne uous dame de fine amour. ke loiautes ne uous ait oublie. ke ie me fi tant en uostre ualour. ka des mest uis ke merchi ai trouuee. (et) ne pourquant ie muir (et) nuit (et) iour. or uous doint die(us) pour oster ma dolour. ke par uous soit mire reconfortee. |
| Souviegne vous dame de fine amour, ke loiautes ne vous ait oublie, ke ie me fi tant en vostre valour, k'ades m'est vis ke merchi ai trouvee, er ne por quant ie muir et nuit et iour, or vous doint Dieus pour oster ma dolour ke par vous soit m'ire reconfortee. |
| Dame bien uoel ke uous sacies de uoir conkes par moi ne fu dame ains amee. ne ia de uous nequier mais remouuoir mon cuer i ai (et) mentente tournee. je nai mestier dame de decuoir. ke de tel mal ne me suel pas doloir. ne meffrees sil uous plaist a lentree. |
| Dame bien voel che vous sacies de voi, c'onkes par moi ne fu dame ains amee, ne ia de vous ne quier mais remouvir, mon cuer i ai et m'entente tournee, ie n'ai mestier dame de decuoir, ke de tel mal ne me suel pas doloir, ne m'effrees, s'il vous plaist, a l'entree. |
| Canson ua tent garde ne remanoir prie celi ki plus ia pooir. ke tu souuent par li soies cantee. |
| Canson va, t'ent garde ne remanoir, prie celi ki plus i a pooir, ke tu souvent par li soies cantee. |