I.
Coustume est bien, quant on tient un prison,
qu'on ne le veut oïr ne escouter,
car nule riens ne fet tant cuer felon
con grant pouoir, qui mal en veut user.
Pour ce, dame, de moi m'estuet douter, 5
car je n'i os parler de raençon
n'estre ostagiez s'en bele guise non.
après tout ce ne puis je eschaper.
II.
D'une chose ai au cuer grant soupeçon,
et c'est la riens qui plus me fet douter: 10
que tant de genz li vont tout environ.
je sai de voir que c'est por moi grever;
adès dïent: - dame, on vos veut guiler;
ja par amors n'amera riches hom -.
Mès il mentent, li losengier felon, 15
car qui plus a, melz doit amors garder.
III.
Se ma dame ne veut amer nului,
moi ne autrui, cinq cenz merciz l'en rent,
qu'assez i a d'autres que je ne sui
qui la prïent de faus cuer baudement. 20
Esbaudise fet gaaingnier souvent,
mès ne sé riens, quant je devant li sui;
tant ai de mal et de paine et d'ennui,
quant me couvient dire: - a Dieu vous conmant! -
IV.
Vous savez bien qu'en ne conoist en lui 25
ce qu'en conoist en autrui plainement.
Ma grant folie onques jur ne conui,
tant ai amé de fin cuer loiaument
mès une riens m'i fet alegement:
qu'en esperance ai un pou de refui. 30
Li oiselez se va ferir el glui,
quant il ne puet trouver autre garant.
V.
Souvent m'avient, quant je pens bien a li,
qu'a mes dolors une douçors me vient
si granz au cuer que trestouz m'entroubli, 35
et m'est a vis qu'entre ses braz me tient;
et après ce, quant li sens me revient
et je voi bien qu'a tout ce ai failli,
lors me courrouz et ledange et maudi,
car je sai bien que il ne l'en souvient. 40
VI.
Bele du tout et dure de merci,
se mi travail ne sont par vous meri,
mult vivrai mal, s'a vivre me couvient.