I.
Contre le tens qui devise
yver et pluie d'esté,
et la mauvis se debrise,
qui de lonc tens n'a chanté,
ferai chanson, car a gré
me vient que j'ai enpensé.
Amors, qui en moi s'est mise,
bien m'a droit son dart geté.
II.
Douce dame, de franchise
n'ai je point en vous trouvé,
s'ele ne s'i est puis mise
que je ne vous esgardé.
Trop avez vers moi fierté,
mès ce fet vostre biauté,
ou il n'a point de devise;
tant en i a grant plenté.
III.
En moi n'a pas abstinence
que je puisse ailleurs penser
fors qu'a li, ou conoissance
ne merci ne puis trouver.
Bien fui fez pour li amer,
car ne m'en puis saouler,
et qant plus avrai cheance,
plus la me couvient douter.
IV.
D'une riens sui en dotance
que je ne puis plus celer:
qu'en li n'ait un pou d'enfance.
Ce me fet desconforter
que, s'a moi a bon penser,
ne l'ose de demoustrer.
Si feïst qu'a sa senblance
le peüsse deviner!
V.
Dès que je li fis prïere
et la pris a esgarder,
me fist Amors la lumiere
des euz par le cuer passer.
Cist conduiz me fet grever,
dont je ne me sai garder,
n'il ne puet torner arriere;
li cuers melz voudroit crever.
VI.
Dame, a vos m'estuet clamer
et que merci vos reqiere.
Deus m'i dont merci trouver!