I.
Amors me fet conmencier
une chanson nouvele,
qu'ele me veut enseignier
a amer la plus bele
qui soit el mont vivant:
c'est la bele au cors gent,
c'est cele dont je chant.
Deus m'en doint tel nouvele
qui soit a mon talent!
Que menu et souvent
mes cuers por li sautele. [11]
II.
Bien me porroit avancier
ma douce dame bele,
s'ele me voloit aidier
a ceste chansonele.
Je n'aim nule riens tant
conme li seulement
et son afetement,
qui mon cuer renouvele.
Amors me lace et prent
et fet lié et joiant,
por ce qu'a soi m'apele. [22]
III.
Qant fine amor me semont,
mult me plest et agree,
que c'est la riens en cest mont
que j'ai plus desirree.
Or la m'estuet servir
- ne m'en puis plus tenir
et du tout obeïr
plus qu'a riens qui soit nee.
S'ele me fet languir
et vois jusqu'au morir,
m'ame en sera sauvee. [33]
IV.
Se la mieudre de cest mont
ne m'a s'amor donee,
tuit li amoreus diront
ci a fort destinee.
S'a ce puis ja venir
qu'aie, sanz repentir,
ma joie et mon plesir
de li, qu'ai tant amee,
lors diront, sanz mentir,
qu'avrai tout mon desir
et ma queste achevee. [44]
V.
Cele pour qui souspir,
la bionde coloree,
puet bien dire et gehir
que por li, sanz mentir,
s'est Amors mult hastee. [55]