I.
Amors e jois e luecs e temps
mi fan tornar lo sen en derc
d'aquel joi qu'avia l'autr'an
qan chassava lebr'ab lo bou:
ara·m va meils d'Amor e pieis,
car ben am, d'aizo·m clam astrucs;
mas Non-Amatz ai nom anquers
s'Amors no venz son dur cor e·l mieus precs.
II.
Cel qe totz bes pert a ensems,
mestiers l'es que ric segnior cerc
per restaurar la perd'e·l dan,
qe·l paubres no·il valri'un ou:
per zo m'ai eu chauzit en leis
don non aic lo cor ni·ls oils clucs,
e pliu·t, Amors, si la·m conqers,
trevas tostemps ab totas fors dels decs.
III.
Pauc pot hom valer de joi sems;
per me·l sai que l'ai agut berc,
car per un sobrefais d'afan
don la dolor del cor non mou
- e s'ab ioi l'ira no·m foreis...-
tost m'auran mei paren faducs;
pero tal a mon cor convers
q'en leis amar volgra morir senecs.
IV.
Non sai un tant si'en Dieu frems,
ermita ni monge ni clerc,
com ieu sui seleis de cui chan,
e er proat anz de l'annou;
liges sui seus meilz qe demeis,
si·m for'eu si fos reis o ducs,
tant es en leis mos cors esmers
qe s'autra·n voil ni·n deing, donc si'eu secs.
V.
D'aizo c'ai tant duptat e crems
creis ades e meillur e·m derc,
que·l reproers c'auzi antan
me dis que tan trona tro plou;
e s'ieu mi pec cinc anz o seis,
ben leu, can sera blancs mos sucs,
jauzirai zo per qu'er sui sers,
c'aman preian s'afranca cor ufecs.
VI.
De luencs suspirs e de greus gems
mi pot trar cella cui m'aerc
c'ades sol per un bel semblan
n'ai mogut mon chantar tot nou.
Contramon vauc e no m'encreis,
car gent mi fai cujar mos cucs.
Cor, vai sus! ben fas si·t suffers:
sec tan qu'en lieis c'as encubit no·t pecs.
VII.
Ans er plus vils aurs non es fers
c'Arnauz desam leis ont es fermanz necs.