I.
Amors e iois e luecs e temps
me fan tornar lo sen enderc:
d'aquel ioi c'avia l'autr'an
can chassava lebr'a bou,
ara·m va mieils d'amor e peis
car ben am, d'aizo·m clam astrucs,
mas non-amatz ai nom anquars
s'amors no venz son dur cor e·l mieus precs.
II.
Cel que totz bes pert a ensems
mestiers l'es que rics segniors cerc
per restaurar la perd'e·l dan,
que·l paubres no·ill valri'un ou:
per zo m'ai eu chauzit en leis
don anc non aic lo cor ni·ls oils clucs
e pliu·t, amors, si la·m conquers,
trevas tostemps ab totas fors dels dets.
III.
Pauc pot hom valer de ioi sems:
per me·l sai que l'ai agut berc,
car per un sobrefais d'afan
don la dolor del cor no·s mou...
e s'ab ioi l'ira non foreis
tost m'auran mei parent faducs,
pero tal ha mon cor convers
qu'en leis amar volgra morir senecs.
IV.
Non sai un tant si'en Dieu ferms,
ermitan ni morgue ni clerc,
con eu sui seleis de cui chant,
et er proat anz de l'an nou:
liges soi seus meils que demeis,
si·m fora eu si·m fos reis o ducs,
tant es en leis mos cors enmers
que s'autra·n voil ni·n deing, donc si'eu secs.
V.
D'aizo que ai duptat e crems
creis ades e meillur e·m derc,
que·l reproers c'auzi antan
me dis que tan trona tro plueu,
e s'iu mi pec cinc anz o seis
benleu, can sera blanc mos sucs,
iauzira zo per qu'er sui sers,
c'aman preian s'afranca cor ufecs.
VI.
De luencs suspirs e de greus gems
mi pot trair cella cui m'aerc,
c'ades sol per un bel semblan
n'ai mogut mon chantar tot nou:
contramon vauc e no m'encreis,
car gent mi fai cuiar mos cucs;
cor, vai sus: ben fai si·t suffers;
sec tan qu'en lieis c'ai encubit no·t pecs.
VII.
Anz er plus vils aurs non es fers
c'Arnauz desam leis ont esfer manz necs.