I.
Amors e iois e liocs e tems
mi fan tornar lo sen e derc
d’aqel noi c’avia l’autr’an
can cassava·l lebr’ ab lo bou;
era·m vai mieltz d’amor e pieis,
car ben am, d’aiso·m clam astrucs,
ma non amatz ioi gau en cers,
s’Amors no vens son dur cor e·l mieus precs.
II.
Cel que totz bes pert a ensems
mestiers l’es que ric segnor cerc
per restaurar la perd’ e·l dan,
qe·l paubres no·il valri’un uou;
per so m’ai ieu causit e lieis,
don non aic lo cor ni·ls uoills clucs;
e pliu·t, Amors, si la·m conquers,
trevas totz temps ab totas, fors dels decs.
III.
Pauc pot hom valer de ioi sems:
per me·l sai que l’ai agut berc,
car per un sobrefais d’afan
don la dolor del cor no·s mou;
e s’ab ioi l’ira no·m for eis
tost m’auran miei paren faducs;
pero tals a mon cor convers
q’en liei amar volgra murir senecs.
IV.
Non sai un tan si’ e Dieu frems,
ermita ni monge ni clerc,
cum ieu sui e leis de cui can,
et er proat ans de l’annou.
Liges soi sieus mieltz que demieis:
si·m for’ ieu si fos reis o ducs;
tant es e lieis mos cors esmers
que s’autra’n voil ni’n deing, donc si’eu secs!
V.
D’aiso c’ai tant duptat e crems
creis ades e meillur e·m derc,
q’el reproers c’auzi antan
me dis que tant trona tro plou;
e s’ieu mi pec cinc ans o sieis,
ben leu, can sera blancs mos sucs,
gausirai so per q’er sui sers,
c’aman preian s’afrança cors ufecs.
VI.
De luencs suspirs e de grieus gems
mi pot trair cella cui m’aerc
c’ades sol per un bel semblan
n’ai mogut mon chantar tot nou.
Contra mon vauc e no m’encreis,
car gent mi fai pensar mos cucs.
Cor, vai sus: ben sai, si·t suffers,
sec tant q’en lieis, c’ai encubit, no·t pecs.
VII.
Ans er plus vils aurs non es fers
c’Arnautz desam lieis ont es fermanz necs.