I.
Biaus m'est estez que retentist la brueille,
que li oisel chantent par le boschage,
et l'erbe vert de la rousee mueille
qui resplendir la fat lés le rivage.
De bone Amour vueill que mes cuers se dueille,
car nus fors moi n'a vers li ferm corage;
et nonporquant trop est de haut parage
cele cui j'aim; n'est pas drois que me vueille.
II.
Fins amans sui, conment qu'Amours m'acueille,
car je n'aim pas con hom de mon eage,
qu'il n'est amis qui aint ne amer sueille
qui plus de moi ne truist amour sauvage.
Ha las, chaitis! ma dame a cui s'orgueille?
– vers son ami, cui dolour n'assouage.
Merci, Amors, s'ele esguarde parage,
donc sui je mors, més pensés que me vueille.
III.
De bien amer Amours grant sens me baille,
si m'a traï s'a ma dame n'agree;
la volenté pri Dieu que ne me faille,
car mout m'est bel quant u cuer m'est entree;
tout mi pens sunt a li, u que j'aille,
ne rienz fors li ne me puet estre mee
de la dolour dont souspir a celee;
a mort me rent, ainz que longues m'asaille.
IV.
Mes bien amers ne cuit que rienz me vaille,
quar pitiez est et mercis oublïee
envers cele qui si grief me travaille
que gieus et ris et joie m'est veee.
He las, chaitis! si dure dessevraille!
De joie part et la doleur m'agree,
dont je souspir coiement, a celee;
si me rest bien, conment qu'Amours m'assaille.
V.
De mon fin cuer me vient a grant mervoille,
qui de moi est, et si me vuet ocire
k'a essïent en si haut lieu tessoille;
donc ma dolour ne savroie pas dire;
ensinc sui morz, s'Amours ne mi consoille;
car onques n'oi par li fors poinne et ire,
mais mes sire est, si ne l'os escondire:
amer m'estuet, puis qu'il s'i aparoille.
VI.
A mie nuit une dolors m'esvoille,
que l'endemain me tolt joer et rire;
qu'a droit consoil m'a dit dedanz l'oroille:
que j'ain celi pour cui muir a martire.
Si fais je voir, més el n'est pas feoille
vers son ami qui de s'amour consire.
de li amer ne me doi escondire,
nou puis noier, mes cuers s'i aparoille.
VII.
Gui de Ponciaus, Gasçoz ne set que dire:
li dex d'amors malement nos consoille.