I.
Soupris d'amours et plains d'ire
m'estuet par esfors chanter;
se m'en peüsse escondire
du tout le laissaisse ester:
laissier doi jüer et rire,
quant la me convient penser
ou l'en pluz veut mon martyre,
n'ochoison n'i puis trouver
fors bien amer.
II.
J'ai maintes foiz oï dire:
faus cuers fait desesperer;
li esmai et li consire
doivent la joie amener
que loiauz amis desirre;
en ce me doi conforter.
Bien me puet ma dame ocirre,
ja ne m'i verra fausser;
c'est sans giler.
III.
Doucement me seut destraindre
quant ele me dit: – Amis,
desormais puet bien remaindre
ce que tant m'avez requis;
qu'amours est legiere a faindre
puiz qu'el change en douz païz. –
La u autres doit ataindre
ne sera ja mes cuers mis,
si l'ai empris.
IV.
Je ne me sai de li plaindre
ne ne doi, ce m'est avis;
trop seroit fors a restraindre
mes cuers puiz qu'il l'a empris.
De tant est ma dolors graindre
que je l'ai de loins apris
a desamer ou a faindre.
Deceü m'a ses clers vis
et ses douz ris.
V.
D'Amours ne me puis desfendre;
face de moi son plaisir!
Legierement me puet rendre
ce que m'a fait desservir.
Bien ai apris a atendre;
ne doi perdre par soufrir.
Las! pour ce n'est mie mendre
la doleurs dont je souspir
sans repentir.
VI.
Dame, maint en voi emprendre
a trichier et a mentir;
maiz onques n'i seu aprendre;
se de vous puisse joïr!
a ce vous en poëz prendre
que loial sunt mi souspir;
si est granz pechiés de vendre
joie que l'en puet merir
par tel desir.
VII.
Gascçoz dist qu'amours emprendre
ne doit nus sanz maintenir
jusqu'au morir.