I.
Quant li temps renverdoie
contre le tens pascour,
m'est vis que chanter doie
aprés ire et dolour
dont tant avoir soloie,
por servir fine Amor.
Mais se ma dame avoie,
mout avroie richour,
que mes cuers ne vuel nule avoir
fors li cui n'en doigne chaloir.
II.
Grant poinne a et grant ire
en amor maintenir,
plus que ne vos puis dire,
qui tant la vuet servir.
Por ce muir a martire,
que ne m'en puis partir.
Foux est qui ce desirre
dont il cuide morir,
que mes cuers ne vuel nule avoir
fors li cui n'en doigne chaloir.
III.
Las, petit me solace
ce dont j'ai bon mestier,
de faillir me menace
quant je plus la requier.
Ne por mal que me face
ne vuil mon cuer changier;
pechié fait s'el porchace
m'ire et mon encombrier,
que mes cuers ne vuel nule avoir
fors li cui n'en doigne chaloir.
IV.
Mout ai chier comparee
ceste amour, lonc tens a,
de ma dame honoree;
s'el vuet, si m'ocira;
et s'il ne li agree,
ne sai que ce sera;
or croi qu'ele est desvee
se de moi merci n'a,
que mes cuers ne vuet nule avoir
fors li cui n'en doigne chaloir.
V.
En atente d'ahie
avrai lonc tens amé,
si m'a en sa baillie
leal Amor trové,
et qui en li se fie,
tost l'a guierredoné;
por moi nou di je mie:
d'autrui l'ai esprové;
que mes cuers ne vuel nule avoir
fors li cui n'en doigne chaloir.
VI.
Odin, ce sachiez bien de voir
que nule autre ne vuil avoir.