I.
Or ne puis je plus celer
le mal d'amors que je sent;
si me destroint durement
que ne puis aillors penser.
Bien doi oblïer
toute autre pensee
pour fine Amor
qui s'est afermee
en moi sanz retor.
II.
Cist maux me vint d'esgarder
et si me prist en pensant;
mout me grieve et me plait tant
que n'en puis mon cuer oster,
ne n'os demander
ce que plus m'agree;
mais par Amor
m'iert joie donnee,
se je l'ai nul jor.
III.
Riens ne puis tant desirrer
n'autre joie ne demant
fors que veoir son semblant,
son douz ris, son biau parler
et son douz penser
savoir a celee
et que s'amor
me fust adonee
sanz autrui amor.
IV.
Se tant me voloit doner,
fait m'avroit lié et joiant;
més mieuz vuil tout mon vivant
por li griez maux endurer
que par son parler
vers moi fust iree
cele ou m'amor
ai tote atornee
sanz faire autre ator.
V.
Dame cui je n'os nommer,
a vos me doing en comant
et tant l'aing et plus por tant
que je vos ai tant amé
et si bien celé
c'onques a rien nee
ne dis m'amor;
ja n'iert acusee
par faux jangleour.
VI.
Gent cors au vis cler,
soiez apensee
de ceste amour
qu'encor soit ostee
par vos ma dolour.
Amauri, desver
doit bien cil qui bee
a tel amour
qui li est vehee
sanz avoir douçour.