I.
Chanters me plait qui de joie est norriz,
mais par esfort ne doit nuns chanson faire.
Puis que solaz est de fin cuer partiz,
poine i couvient, ainz qu'en li puist ratraire.
Mais cil qu'amors et talanz fait chanter
de legier puet bone chanson trover,
ce que nuns hons ne feroit sanz amer.
II.
De fine Amour est mes cuers esjoïz;
onques n'ama cil qui s'en puet retraire.
Li enuious en font plaintes et criz
qu'ele nes doigne a son servise atraire.
Mais ma dame doi je mout mercïer,
car nuit et jor me fait a li panser,
si ne me puet de riens tant honorer.
III.
Quant je resgart son cors et j'oi ses diz,
et voi son vis, toz li cuers m'en esclaire;
aprés en sui destroiz et esbahiz,
quant je ne puis ma grant joie a chief traire.
Et je comant? Quant n'os a li parler,
ne n'os voloir qu'ele le daint cuider,
tant me covient sa valor redouter.
IV.
Mes granz desirs n'en doit estre periz,
par ce m'en gart la raisons de meffaire;
si l'amerai, sanz proier escondiz,
quant tant ne vail que je li doie plaire.
Dex, qui li vost tant de ses biens doner
que je ne l'os a seür esgarder,
me doint joïr de si haut desirrer!
V.
De ses valors ai en mon cuer escriz
tant et de telx que je nel sai retraire;
et quant avient que je sui endormiz,
solaz en ai com celui qui doit plaire.
Més cruelment le m'estuet comparer
au resvoillier, quant je ne puis trover
ce qu'en dormant m'estuet avisoner.
VI.
Renaut, j'en sui legiers a conforter,
car se je muir por tel poinne endurer,
plus vaut honors que mors ne puet grever.